Nuair a bhainimid an tseafóid agus an cur i gcéill ar fad de, is éard atá i gceist leis an gcáinfhaisnéis a fógraíodh sa Dáil an tseachtain seo ná ciorruithe cánach do na daoine saibhre agus tacaíocht do ghnólachtaí, agus gan ach rudaí imellacha don chuid eile againn.
Tá €1.65 billiún as pacáiste buiséid iomlán €8.5 billiún á leithdháileadh ar fhaoiseamh cánach ioncaim, ach ar bhealach nach dtéann chun tairbhe ach do mheánioncam agus d’ioncam níos airde.
Ní bhainfidh aon duine a thuilleann níos lú ná €45,000 aon tairbhe as ar chor ar bith, agus ós rud é gurb é €38,500 an lárioncam bliantúil, ní fheicfidh oibrithe ar phá níos ísle aon chuid den tairbhe sin.
Tráth a bhfuil barrachas gan fasach in airgeadas an stáit, níorbh fhéidir le rialtas Fhianna Fáil/Fhine Gael/Neamhspleách ach spochadh timpeall ar imill imní an lucht oibre.