Deir Macra nach ceart d’aon duine óg a bheith díspreagtha ó ghairm bheatha san fheirmeoireacht, ach gur gá don Rialtas agus don Aontas Eorpach bearta práinneacha a dhéanamh chun í a dhéanamh ina rogha inmharthana don chéad ghlúin eile.
Tháinig an eagraíocht amach leis an ráiteas tar éis don Fheisire Eorpach Luke ‘Ming’ Flanagan a rá go mbeadh daoine óga “as a meabhair” dul isteach san fheirmeoireacht faoi na coinníollacha reatha. Dar le Macra, cé go bhfuil na ráitis géar, léiríonn siad na deacrachtaí fíordháiríre atá roimh fheirmeoirí óga.
Thug an eagraíocht le fios go bhfuil líon na bhfeirmeoirí óga ag laghdú i gcónaí, agus go bhfuil meánaois na bhfeirmeoirí ag ardú de réir a chéile. Níl ach céatadán beag d’fheirmeoirí anois faoi bhun 35 bliain d’aois.
Dúirt Uachtarán Náisiúnta Macra, Josephine O’Neill: “Ar an drochuair, tá go leor daoine óga ag iarraidh dul i mbun feirmeoireachta, ach tá an iomarca constaicí rompu. Tá na dúshláin seo fairsing agus seanbhunaithe – rochtain ar thalamh, rochtain ar mhaoiniú agus comharbas, gan ach cuid de na fadhbanna a lua.”
Luaigh Macra costais ionchuir atá ag ardú, deacrachtaí maidir le talamh agus maoiniú a fháil, éiginnteacht faoin gComhbheartas Talmhaíochta (CBT) amach anseo, agus easpa tacaíochtaí ríthábhachtacha, amhail deontas suiteála, mar chuid de na constaicí is mó.
Dúirt an eagraíocht gur féidir le gairm bheatha sa talmhaíocht deiseanna agus sásamh mór a thabhairt, ach go gcaithfear tacaíochtaí cuí a chur ar fáil chun todhchaí inmharthana agus inbhuanaithe a chinntiú d’fheirmeoirí óga.
D’athdhearbhaigh Macra a cuid éileamh ar mhaoiniú faoi leith atá cosanta de réir dlí d’fheirmeoirí óga faoin gcéad CBT eile, deontas suiteála a thabhairt isteach in Éirinn, tacaíochtaí níos láidre don chomharbas agus infheistíocht leanúnach chun brabúsacht agus athléimneacht feirmeacha a fheabhsú. Thug siad foláireamh freisin nach leor plé ar athnuachan glúine amháin agus go bhfuil gá le gníomh láithreach.