Thóg sé thart ar 15 nóiméad ar na trí bhreitheamh sa Chúirt Achomhairc Dé Máirt cinneadh a dhéanamh ar an mbreithiúnas agus bhronn siad Deimhniú Iomrall Ceartais ar Osgur Breatnach maidir lena chiontú mícheart i robáil Thraein Phoist na Sollán in 1976. Ba é Breatnach duine de 40 ball den IRSP a gabhadh, cuid acu ag baill de ghrúpa scáthach laistigh de na Gardaí ar a dtugtaí ‘an Díorma Crua’ a raibh cáil orthu as admhálacha a fháil agus d’admhaigh roinnt de na daoine a gabhadh coireanna nár dhein siad.
In ainneoin fianaise leighis agus a maíomh gur céasadh iad, ciontaíodh Breatnach, Brian McNally agus Nicky Kelly sa Chúirt Speisialta neamhghiuiré ar bhonn a ráiteas amháin. I gcás Mick Plunkett, duine nár thug aon admháil, fuarthas neamhchiontach é, ach gearradh pianbhreith 12 bhliain príosúnachta ar Bhreatnach agus Kelly agus 8 mbliana príosúnachta ar McNally.
D’éalaigh Nicky Kelly, an t-aon mharthanóir eile inniu as an gceathrar a cuireadh ar a dtriail, an lá roimh an mbreithiúnas agus an phianbhreith.