Cé a cheapadh go mbeadh trodaíocht cháis agus gluaisrothair ag luascadh sa spéir ar phlásóg an Tí Bháin in ardchathair na Stát Aontaithe chun ceiliúradh a dhéanamh ar ochtódú breithlá an Uachtaráin Donald Trump?
D’éinne a chonaic an físeán de shraith gluaisrothar ag dul ar rampaí ar luas lasrach agus ag luascadh sa spéir mar a dhéanadh Evel Knievel tráth dá raibh sna 1970í agus an Teach Bán sa chúlra, bhí neart grinn le baint as a leithéid de thaispeantás, léiriú foirfe, b’fhéidir, ar an áiféiseacht a bhaineann le hUachtarán Trump.
Bhí alltacht ar na liobrálaigh, ar ndóigh, as an ísliú dínite a chothaíonn sé seo d’oifig na huachtaránachta, dar leo. Dar lena lán is macalla é seo den mheathlú a bhain le hImpireacht na Róimhe sna laethanta deiridh míle go leith bliain ó shin.