Le marú Yves Sakila ar Shráid Anraí an tseachtain seo caite is léir gur gá breathnú ar na comhlachtaí slándála. Is uafásach an bealach ar maraíodh é, mar a d’fheicfeá i gcás póilíní i Meiriceá. Ar a laghad ní comhartha é ar chiníochas institiúideach. Ach tá ceisteanna le freagairt.
An raibh, mar shampla, grinnfhiosrúchán déanta ag na gardaí ar an lucht slándála? Cén saghas oiliúna a fuair siad? An raibh aon fhadhbanna leo roimhe seo. De réir dlí ní ceadmhach ach fórsa atá ag teastáil a úsáid agus duine á ghabháil, agus ní níos mó. Cinnte, ní ceadmhach fórsa mairfeach a úsáid.
Má bhí oiliúint san ealaín chomhraic acu bheadh a fhios acu conas fórsa a úsáid gan duine a ghortú ná a mharú. I ndeireadh na dála is iad na fir shlándála sin atá freagrach as a ngníomhaíochtaí féin. Ba chóir go mbeadh siad os comhair na cúirte chun freagracht a ghlacadh as an marú seo.