In ainneoin na cainte ó Mhicheál Martin a raibh cuma na muiníne uirthi, ceapaimse gur chruinnigh an ghéarchéim reatha laistigh d’Fhianna Fáil an gá atá le hathrú. Agus ní hé an cheist an mbeidh, ach cathain a bheidh athrú ceannaireachta ann.
Tá sotal Martin imithe as smacht anois. A fhianaise sin an ghoimh a dhíríonn sé ar Mary Lou McDonald sa Dáil.
Is cóir go bhféadfadh easaontais, clamhsán agus cáineadh a dhéanamh gan nimh, ach ní nós le Martin a bheith béasach. Tá an chuma air go gcreideann sé gur laige é béasa.
Air sin is léir gur cuma leis tuairimí theachtaí a pháirtí féin, gan caint faoi thuairimí an phobail trí chéile. Cuireann sé as dó mura bhfuil daoine sásta a bheith ciúin agus déanamh mar deir sé.
Bhí an tuairim ghinearálta i bhFianna Fáil gur fearr é a fhágáil mar cheannaire agus mar thaoiseach go dtí deireadh na bliana seo nuair a bheidh deireadh le tréimhse na hÉireann mar uachtarán ar an Aontas Eorpach agus deireadh le ré Martin mar thaoiseach ar aon chuma.