Is toradh ar chairdeas agus ar chomhrá laethúil Gaeilge é an leabhar nua faoi spórt agus polaitíocht in Éirinn atá scríofa ag Paul Rouse agus Cathal Billings, dar leis an staraí Rouse, a bhí ag labhairt le An Páipéar ag Oireachtas na Samhna i gCill Airne.
Seo an chéad leabhar iomlán Gaeilge le Rouse, agus dúirt sé gur chomhlíon sé uaillmhian phearsanta leis an saothar. Thug sé ardmholadh do Billings as a chuid taighde agus scríbhneoireachta, agus as an stíl a chuir sé ar an leabhar.
“Gan mo chara Cathal Billings ní bheadh an leabhar seo críochnaithe,” a dúirt sé. “Rinne sé sárjab leis an taighde agus an scríbhneoireacht.”
Dúirt Rouse go raibh sé an-bhródúil as an saothar a bhí curtha i gcrích acu agus as é a bheith á sheoladh ag an Oireachtas. Ba é seo a chéad chuairt ar an bhféile, rud a d’fhág idir iontas agus aiféala air.