Tá an t-éileamh ar chúrsaí tríú leibhéal trí Ghaeilge i réimsí amhail an tsíceolaíocht, an eolaíocht agus an stair á fhiosrú mar chuid de thaighde náisiúnta atá ar bun in Ollscoil na Gaillimhe.
Beidh deis ag mic léinn, léachtóirí, múinteoirí meánscoile agus daoine atá ag obair san earnáil phoiblí a dtaithí agus a dtuairimí a roinnt leis an bhfoireann taighde. Táthar ag súil le tuarascáil a fhoilsiú i mí na Bealtaine.
Ag labhairt le An Páipéar, dúirt Ciara Ní Aodhgháin, léachtóir i Scoil na Síceolaíochta in Ollscoil na Gaillimhe, go bhfuiltear ag iarraidh a fháil amach cé na hábhair ar mhaith le daoine staidéar a dhéanamh orthu trí Ghaeilge.
Ní ar chúrsaí teanga amháin atá an obair dírithe. Tá réimse leathan ábhar acadúil faoi chaibidil, agus an fhoireann ag iarraidh tuiscint níos fearr a fháil ar na deiseanna atá ag teastáil ó phobal na Gaeilge san ardoideachas.