Tá gá le níos mó aitheantais do chanúintí Gaeilge Mhaigh Eo agus le deiseanna níos fearr dá gcainteoirí teacht le chéile, dar le Darren Ó Riagáin, a thug léacht faoi shaibhreas teanga an chontae ag Oireachtas na Samhna i gCill Airne.
Ag labhairt le An Páipéar, dúirt sé gur chuir an slua a tháinig chuig an ócáid iontas agus misneach air. Cé go bhfuil dúshláin mhóra roimh an teanga sna ceantair éagsúla, mhaígh sé gur cheart aird a dhíriú ar an nGaeilge bheo atá iontu agus ar an mórtas atá á athmhúscailt ina measc.
Ba iad Gaeilge Iorrais agus Pobal Gaeilg’ Acla a d’eagraigh an léacht, agus bhí seisiún ceoil thraidisiúnta le ceoltóirí agus amhránaí Mhaigh Eo ina diaidh. Bhí éagsúlacht na gcanúintí agus a dtábhacht don phobal lárnach sa chur i láthair.
Dar le Ó Riagáin, níor cheart labhairt ar chanúint aonair Mhaigh Eo amhail is gur mar a chéile an chaint ar fud an chontae. Tá difríochtaí suntasacha idir Gaeilge Iorrais, Acla agus Thuar Mhic Éadaigh, idir fhoghraíocht, rithim, stór focal agus leaganacha cainte.