Bhí meas agam i gcónaí ar an eagraíocht Cumann Chluain Árd i mBéal Feirste, agus is iomai údar atá leis sin. Bhí an t-ádh liom gur bhuail mé le baill de ghlúin níos sine, leithéidi Thomáis Uí Mhonacháin, sula bhfuair sé bás, agus, ar ndóigh, le neart daoine ó ghlúin eile atá fós linn, macasamhail Sheáin and Shéamuis Mhic Sheáin. B’oth liom i gcónai nach raibh sé de phribhléid agam bualadh le hAlf Ó Murchú, Tomás Mac Bhráin, Liam Boomer, Colm Mac Giolla Fhionntáin agus Seosamh Mistéil.
Is é an dara cúis gur mhothaigh mé compordach san áit ná go raibh polasaí acu i gcónaí gan ligean do chursaí polaitíochta teacht isteach sa Chumann. Thaitin sé liom fosta gur daoine iad a bhí sásta cibé cineál oibre a bhí riachtanach a dhéanamh, is cuma más péinteáil na mballaí nó teagasc fhilíocht Thír Chonaill a bhí ann agus, ó 1970, bhí cosc ar an Bhéarla!
Tá siad nócha bliain ar an fhód, buíochas le Dia, agus cuireadh tús lena gceiliúradh Dé Sathairn seo caite, an 7 Samhain, sa bhaile reatha dóibh ar Shráid na Sceiche.