Seoladh dhá fhíseán nua de chuid COGG a chuir béim ar bhuntáistí an tumoideachais agus ar ról na scoileanna i neartú na Gaeilge sa phobal ag an Tionól Forbartha i gContae an Chabháin aréir, Déardaoin.
Ba é Conall Ó Máirtín, Leas-Phríomhfheidhmeannach agus Stiúrthóir Seirbhísí Oideachais Fhoras na Gaeilge, a sheol iad in Óstán an Slieve Russell.
Forbraíodh na físeáin i gcomhar le Lorg Media, bunaithe ar thaighde a rinne an Dr Claire Dunne thar ceann COGG faoi bhuntáistí an tumoideachais ag an mbunleibhéal.
San fhíseán faoi scoileanna Gaeltachta tugadh cuairt ar Scoil Sailearna, Scoil Naomh Gobnait i nDún Chaoin agus Scoil an Ghramhnaigh i Ráth Chairn. Roinn múinteoirí, tuismitheoirí agus daltaí a dtaithí ar an oideachas trí Ghaeilge.
“Is tobar í an scoil Ghaeltachta,” a dúirt duine de na rannpháirtithe, agus béim á cur ar an gceangal idir saol na scoile agus úsáid na teanga sa cheantar máguaird.
Léiríodh gníomhaíochtaí eolaíochta, matamaitice agus teicneolaíochta, chomh maith le deiseanna sóisialta agus cultúrtha. Míníodh gur éirigh chomh maith nó níos fearr le daltaí sa tumoideachas ó thaobh gnóthachtáil acadúil de, agus gur bhain siad ardchumas amach sa dá theanga.
Tugadh aird ar leith ar riachtanais bhreise oideachais. Labhair dalta a raibh disléicse air faoin taitneamh a bhain sé as an léitheoireacht agus faoi leabhair oiriúnaithe a d’éascaigh an obair dó.
Mhínigh múinteoir gur cuireadh tacaíocht ar fáil bunaithe ar riachtanais an pháiste, trí dheacrachtaí a aithint, dul i gcomhairle le speisialtóirí agus plean tacaíochta a ullmhú.
Cuireadh síos freisin ar ranganna Gaeilge do thuismitheoirí agus ar an bhfáilte a cuireadh roimh theaghlaigh ó chúlraí éagsúla.
Bhí saibhreas na Gaeilge áitiúla lárnach sa chur chuige. Tugadh deiseanna do dhaltaí an teanga a úsáid le siopadóirí, le foireann na leabharlainne, le daltaí meánscoile agus le daoine aosta ón bpobal.
D’fháiltigh Jacqueline Ní Fhearghusa, Príomhfheidhmeannach COGG, roimh na hacmhainní agus leag sí béim ar eolas taighde a roinnt le tuismitheoirí.
Sa bhfíseán, meabhraíodh do theaghlaigh gur bhain freagracht leo féin freisin as todhchaí na Gaeilge sa Ghaeltacht, agus gur shín an cúram sin thar gheataí na scoile amach chuig saol laethúil an phobail ar fad.
Leanann an tionól ar aghaidh inniú le clár spreagúil agus rogha ceardlann, aoi-léachtaí, agus deiseanna plé do mhúinteoirí agus cheannairí bunscoile, chomh maith le haonach seastán le foilsitheoirí, eagraíochtaí, agus comhlachtaí oideachais, teicneolaíochta, agus Gaeilge.
Tá gach eolas faoin Tionól agus faoin gclár ar fáil anseo: https://gaeloideachas.ie/maidir-gaeloideachas/comhdhail-bhliantuil/?lang=ga