
D’fhéadfadh Glór na nGael líon na gcomhlachtaí atá páirteach i scéim na Ghradaim Ghnó na hÉireann a mhéadú go mór dá n-ardófaí an deontas a fhaigheann sé ó Roinn na Gaeltachta, dar le leas-chathaoirleach na heagraíochta, Máiréad Ní Cheallaigh.
Ag labhairt di ag an searmanas bronnta sa Seomra Cruinn i dTeach an Ardmhéara i mBaile Átha Cliath Dé Céadaoin, dúirt Ní Cheallaigh go raibh 855 comhlacht cláraithe leis an scéim ó cuireadh tús léi in 2022. Tá aitheantas faighte ag 645 comhlacht éagsúil ó shin as an nGaeilge a úsáid ina gcuid gnó.
Bronnadh 361 bonn ar 157 gnólacht i mbliana. Bhain 34 gnólacht an gradam ab airde amach, agus trí bhonn óir ar phlaic gach ceann acu. Bhí 75 de na comhlachtaí ar tugadh aitheantas dóibh lonnaithe sa Ghaeltacht agus 82 lonnaithe lasmuigh di.