Ó chúpla focal fáilte ag an gcuntar go branda a thabhairt os comhair an domhain, pléadh na deiseanna atá ag gnólachtaí leas a bhaint as an nGaeilge ag bricfeasta speisialta i gcathair Chorcaí maidin Dé Máirt.
Thug Scéal Nua ionadaithe ó réimsí an bhia, na folláine, na sláinte agus na foilsitheoireachta le chéile in Óstán an Clayton ar Ché an Lapaigh. Bhí úsáid na teanga chun féiniúlacht gnólachta a neartú agus ceangal le custaiméirí a chothú i gcroílár na gcomhráite.
Is togra de chuid na hOifige Fiontair Áitiúil i gCathair Chorcaí agus Chomhairle Cathrach Chorcaí é. Thug Ard-Mhéara Chorcaí, an Comhairleoir Damian Boylan, an t-aitheasc fáilte, agus bhí an craoltóir Dáithí Ó Sé i mbun an dá phainéal.
I measc na gcainteoirí bhí Cóilín Duffy, eagarthóir An Páipéar; Órla Nic Shuibhne ó Ghlór na nGael; Chris Dorgan, oifigeach forbartha Gaeilge na Comhairle Cathrach; Mícheál Ó Lionáird ó Folláin; Peigín Crowley ó GROUND Wellbeing; agus Aoife Kimber ó Mindmymigraine.ie.