Beidh cloch mhíle thábhachtach á baint amach ag an gCumann Sacair Gaeilge Dé Máirt seo chugainn nuair a reáchtálfar an chéad chruinniú cinn bliana i stair an chumainn, agus blitzchomórtas sacair d’fhir agus do mhná le bheith ar siúl i mBéal Feirste níos déanaí an mhí seo.
Beidh an cruinniú cinn bliana ar siúl ar Zoom Dé Máirt an 10 Samhain ag 7pm, agus tá fáilte roimh gach duine a bhfuil spéis acu i bhforbairt an tsacair trí Ghaeilge freastal air.
Tá an cumann ag lorg baill nua don choiste agus daoine atá sásta cuidiú le forbairt na heagraíochta sna blianta amach romhainn.
Beidh deis ag lucht freastail an chruinnithe breathnú siar ar obair an chumainn go dtí seo agus plé a dhéanamh ar na deiseanna atá ann chun an Ghaeilge a chur chun cinn trí mheán an tsacair.