Tá clár náisiúnta seolta ag Éirinn chun glacadh le hintleacht shaorga (IS) a luathú lena n-áirítear tacar sonraí Stáit nua don Ghaeilge, agus an cruinniú mullaigh IS Idirnáisiúnta ag oscailt i gCumann Ríoga Bhaile Átha Cliath ar an gCéadaoin.
Seachadfaidh an clár Intelligence:Applied, faoin straitéis Éire Digiteach, 35 gníomh go dtí an bhliain 2030 thar téamaí daoine, an geilleagar, an bonneagar agus an t-éiceachóras. Is é an croíphointe atá aige ná clár nua AI Future Skills ar luach €150 milliún i gcóir foghlama ar feadh an tsaoil, mar aon leis an gcéad chéim eile den ardán saor in aisce AIReady.ie, Tascfhórsa Náisiúnta Litearthachta IS agus ionad taighde nua, Rinn AI.
Tobar
I measc na 35 gníomh tá Tobar. Déanann an Rialtas cur síos air mar thacar sonraí Stáit nua a ghabhann an Ghaeilge, an cultúr, an tsainiúlacht agus an traidisiún, a chumasóidh rolladh amach seirbhísí poiblí atá faoi chumhacht IS trí Ghaeilge, agus a thacóidh le forbairt samhlacha móra teanga le cumais teanga agus chultúrtha Gaeilge faoi 2030.
Tugann an t-ainm le fios go bhfuiltear ag iarraidh foinse bhunúsach sonraí a thabhairt don teanga d’intleacht shaorga. Ceanglaíonn sé leis an bPlean Náisiúnta do Sheirbhísí Poiblí Gaeilge 2024-2030 agus leis an sprioc go mbeidh 20% de dhaoine a earcaítear san earnáil phoiblí inniúil i nGaeilge faoi 2030. Áirítear ar an obair atá ann cheana féin teicneolaíochtaí cainte ABAIR Choláiste na Tríonóide, Baile Átha Cliath. Ní fios go fóill cén nasc a bheidh ag Tobar leis a leithéid de Corpas.ie
I measc na mbeart eile sa chlár tá Luasaire Gnóthais Nua IS €21 milliún, bosca gainimh rialála do ghnóthais bheaga agus mheánmhéide ó 2027, cumas comhroinnte IS don earnáil phoiblí agus bunachar sonraí Eircode a oscailt ar an tairseach Sonraí Oscailte.
Is é an cruinniú mullaigh ar intleacht shaorga príomhimeacht Uachtaránacht na hÉireann ar Chomhairle an Aontais Eorpaigh agus osclaíonn sé Mí Nuálaíochta IS na hEorpa, a rithfidh ó Bhaile Átha Cliath go dtí an Bhruiséil ar 17 Samhain faoin téama ‘Úsáid a bhaint as IS chun Iomaíochas na hEorpa a Athrú ó Bhonn’.
Cainteoirí
Ag oscailt an imeachta dó, dúirt Micheál Martin go raibh Éire ar thús cadhnaíochta i ngach tonn teicneolaíochta le scór bliain anuas agus go mbeadh sí amhlaidh don cheann seo freisin. D’fhógair sé fóram nua faoin Fóram Geilleagrach Réitigh Saothair chun tionchar IS ar obair a scrúdú.
Thug Demis Hassabis, comhbhunaitheoir agus cathaoirleach ar Google DeepMind a deimhníodh mar phríomhchainteoir ag an gcruinniú mullaigh, rabhadh go mba cheart déileáil le heachtraí haiceála le déanaí mar rabhadh luath.
“Is dóigh liom gur urchair rabhaidh luatha dúinn iad [na heachtraí seo] go léiríonn nach bhfuil na córais chomh cumhachtach sin fós, agus mar sin nach bhfuil na heachtraí chomh mór sin” a dúirt Hassabis leis an gcruinniú. Dúirt sé go raibh go leor oibre le déanamh chun na cleachtais is fearr a ghlacadh ón mbitheolaíocht agus ón earnáil núicléach agus go mbeadh gá le comhlacht caighdeán idirnáisiúnta sa deireadh.
Tháinig Leas-Uachtarán Feidhmiúcháin Choimisiún na hEorpa Henna Virkkunen agus leaschathaoirleach Microsoft Brad Smith leis, ag iarraidh go mbeadh caighdeáin sábháilteachta fíor agus éifeachtacha ann.
Nóta don léitheoir:
Coinnítear ainmneacha branda an chláir i mBéarla sa scéal seo mar nach bhfuil aon leagan oifigiúil Gaeilge foilsithe ag an Rialtas go fóill ar gov.ie. Nuair a roghnaítear an leagan Gaeilge den suíomh taispeántar an leagan Béarla.