Tá Maith thú a Mhicí, Puisín na mBróg agus An Saol Sona roghnaithe mar bhuaiteoirí Ghradaim Foilsitheoireachta do Leabhair Ghaeilge na Bliana 2026, a fógraíodh ag ócáid cheiliúrtha sa Taibhdhearc i nGaillimh Dé Céadaoin, 30 Meán Fómhair.
D’fhógair an tOireachtas na torthaí i gcomhpháirt le Foras na Gaeilge, agus bronnadh na gradaim ar na buaiteoirí ag Uachtarán an Oireachtais, Áine Ní Ghlinn. Bhí naoi leabhar déag ar ghearrliostaí na dtrí chatagóir i mbliana.
Bronnadh Gradam Uí Shúilleabháin, do Leabhar na Bliana don Léitheoir Fásta, ar Maith thú a Mhicí, cnuasach saibhir scéalta le Micí Sheáin Néill Ó Baoill atá foilsithe ag Éabhlóid. Tá duais €2,500 ag dul don údar agus €5,000 don fhoilsitheoir.
Ba é Puisín na mBróg, le Fearghas Mac Lochlainn agus maisithe ag Paddy Donnelly, a ghnóthaigh Gradam Réics Carló do Leabhar na Bliana don Léitheoir Óg. Futa Fata a d’fhoilsigh an leabhar samhlaíoch greannmhar seo. Gheobhaidh an t-údar agus an maisitheoir €1,250 an duine, agus bronnfar €5,000 ar an bhfoilsitheoir.