Bhí os cionn 100 duine i láthair Dé Sathairn seo caite do sheoladh Chomórtas Peile na Gaeltachta 2027 i Lios Póil, ócáid a léirigh an tacaíocht láidir atá sa phobal don chomórtas mór a bheidh ar siúl i gCorca Dhuibhne an samhradh seo chugainn.
Bhailigh baill CLG Lios Póil, imreoirí, iarimreoirí, lucht tacaíochta, muintir na háite agus aíonna i dTigh Tábhairne Uí Shúilleabháin don seoladh oifigiúil. Rinneadh ceiliúradh ar an gcumann, ar chultúr agus ar theanga an cheantair, agus cuireadh tús foirmiúil leis an gcomhaireamh síos go dtí an comórtas.
Taispeánadh gearrscannán den chéad uair ina raibh scéal CLG Lios Póil á insint ag cuid de na daoine a chruthaigh agus a mhúnlaigh an cumann ar feadh na mblianta. Bhí imreoirí, iarimreoirí agus cairde an chlub le feiceáil ann agus tugadh léargas ar stair, féiniúlacht agus grá an phobail don Ghaeilge.