Tabharfaidh Katie Taylor aghaidh ar Flora Pili i bPáirc an Chrócaigh Dé Sathairn an 5 Meán Fómhair (Beo ar RTÉ 2 / RTÉ Player / RTÉ 2fm / DAZN – 8 pm) i dtroid a mheastar a bheidh ar an gceann deireanach dá gairmréim stairiúil.
Beidh deis ag Taylor a bheith ina curadh domhanda éadrom-mheáchain throim gan cheistiú den dara huair nuair a rachaidh sí in adharca leis an bhFrancach gan sárú. Cuirfidh an ócáid clabhsúr oiriúnach, b’fhéidir, ar cheann de na gairmréimeanna is suntasaí i stair spórt na hÉireann.
Tá codarsnacht mhór idir Páirc an Chrócaigh lán go doras agus an áit ar thosaigh Taylor ag foghlaim a ceirde beagnach 30 bliain ó shin. Agus í ina cailín óg i mBré, bhain sí triail as an dornálaíocht faoi stiúir a hathar Pete. Bhíodh sí ag traenáil ar an bhféar nuair nach raibh ionad ceart ar fáil agus í ag cur feabhas ar a cuid scileanna in éineacht lena deartháir Peter.