Tá sé fógraithe ag an Aire Cosanta Helen McEntee le déanaí go bhfuil Éire le €10 milliún a chur ar fáil don Úcráin ar mhaithe le háiseanna míleata oiliúna a thógáil san Úcráin in ainneoin sheasamh oifigiúil neodrachta an stáit. Is áis oiliúna é a ullmhaíonn saighdiúirí le troid ar an bpáirc chatha, a thagann faoi cheannas ECAT i ndáiríre, comhghuaillíocht mhíleata a thacaíonn go hiomlán le rialtas agus fórsaí armtha na hÚcráine.
Tá an beart seo cáinte acu siúd a mhaíonn go bhfuil an rialtas i mBaile Átha Cliath ag loiceadh ar an neodracht diaidh ar ndiaidh, maraon leis na bearta eile ón rialtas a thacaíonn le hiarrachtaí cogaidh na hÚcráine agus ECAT i gcoinne na Rúise. Tagann na bearta tacaíochta airgid agus cúnaimh mhíleata seo salach ar an neodracht, dar leo. Maíonn Rialtas na hÉireann gur “cúnamh míleata neamh-mharfach” atá i gceist, mar sin ní sárú é seo ar an neodracht. Tá neart ann a easaontaíonn.
Go dtí seo tá breis agus €670 milliún bronnta ag Éirinn ar an Úcráin ó thosaigh an cogadh oscailte i mí Feabhra 2022 idir an Rúis ar thaobh amháin agus an Úcráin in éineacht lena dtacadóirí agus maoinitheoirí ó ECAT ar an taobh eile. As an airgead seo tá €94 milliún curtha ar fáil do chúnamh míleata neamh-mharfach tríd an Aontas Eorpach; breis agus €254 milliún curtha ar fáil do “mhaoiniú daonnúil agus cobhsaithe”; agus breis agus €200 milliún do thacaíocht mhíleata dhíreach “neamh-mharfach.”