Tá céannacht amhairc nua nochta ag Comhairle Cathrach na Gaillimhe atá fréamhaithe in oidhreacht shibhialta agus mhuirí na cathrach agus a thugann áit níos feiceálaí don Ghaeilge.
Coinnítear an marún mar phríomhdhath sa dearadh nua, agus úsáidtear gorm freisin mar léiriú ar Abhainn na Gaillimhe. Tá an litir bheag “g” i gcroílár na céannachta, agus a cruth bunaithe ar chabhail na loinge atá le feiceáil ar Armas Chathair na Gaillimhe. Tarraingíonn stíl na litreach freisin ar thraidisiún an tseanchló, an cló Gaelach.
Beidh ainm Gaeilge an údaráis áitiúil, Comhairle Cathrach na Gaillimhe, níos suntasaí sa chóras nua. Coinneofar Armas na Cathrach mar chuid den bhranda agus leanfar dá úsáid ar shéala oifigiúil na cathrach agus i gcomhthéacsanna foirmiúla, lena n-áirítear slabhraí oifige an Mhéara agus an Leas-Mhéara.