Ní bheidh páistí ná déagóirí faoi bhun 15 bliana d’aois in ann cuntas meán sóisialta a oscailt gan cead sainráite ó thuismitheoir nó ó chaomhnóir, de réir dréachtphleananna nua atá curtha chun cinn ag Uachtarán an Choimisiúin Eorpaigh, Ursula von der Leyen.
Nocht von der Leyen an moladh, ar a dtugtar an “Acht AE na bPáistí”, ina haitheasc bliantúil ar Staid an Aontais os comhair Pharlaimint na hEorpa in Strasbourg Dé Céadaoin. Thug sí féin agus Henna Virkkunen, Leas-Uachtarán Feidhmiúcháin an Aontais Eorpaigh um Cheannasacht Teicneolaíochta, Slándáil agus Daonlathas, tuilleadh sonraí faoin bplean Déardaoin.
Tá sé mar aidhm leis na bearta rochtain páistí agus déagóirí ar ardáin na meán sóisialta a chosc nó a chur siar. Cé nach bhfuil aois shonrach dheiridh socraithe go fóill, meastar go mbeidh ceithre leibhéal cosanta sa dréachtphlean.