Tá baile digiteach nua curtha ar fáil d’amhráin Abair Amhrán tar éis breis agus cúig bliana d’obair dheonach, agus taifeadtaí ón mbailiúchán cáiliúil le fáil anois ar www.abairamhran.ie.
Is foilseachán de chuid Chomhaltas Uladh é Abair Amhrán a bhfuil glúnta daoine tar éis é a mhúnlú. Ó foilsíodh den chéad uair é in 1962 tá sé ina fhoinse thábhachtach d’amhránaithe, do mhúinteoirí, do cheoltóirí agus do ghníomhaithe teanga.
Tá clúdach glas ar an eagrán clóite is déanaí, mar a bhí ar an chéad eagrán, agus coinníodh an bunlógó chomh maith, cé gur cuireadh cuma dhigiteach air don ré nua. Tá aitheantas ar leith tugtha d’Ógras agus do Pheadar Mac Muiris, a chuir an leabhar le chéile den chéad uair.
Tá scéal an fhoilseacháin fite fuaite le stair na gcoláistí samhraidh, go háirithe Coláiste Bhríde i Rann na Feirste. D’fhoghlaim glúnta daltaí na hamhráin ansin sular thug siad abhaile leo iad, rud a chuidigh leis an traidisiún a scaipeadh. Meastar go bhfuil Abair Amhrán ar cheann de na leabhair Ghaeilge is mó díol riamh.
Tugann an suíomh nua taifeadtaí le chéile ó amhránaithe agus ó cheoltóirí a thug a gcuid ama go deonach. Den chéad uair, beidh daoine ar fud an domhain ábalta éisteacht leis na hamhráin agus iad a fhoghlaim ar aon ardán amháin. Is céim shuntasach í sin chun tionchar an bhailiúcháin agus an traidisiúin amhránaíochta a leathnú.
Ghabh Comhaltas Uladh buíochas le gach duine a chuir leis an obair, agus thug an eagraíocht aitheantas ar leith do Jack Warnock, do Bhláithín Mhic Cana agus do Dermot Mulholland as an tionscadal a thabhairt chun críche.
Ag an seoladh i nGaeláras Mhic Ardghail bhí deis ag daoine a bhfuil baint acu leis an leabhar le blianta fada éisteacht arís le hamhráin a mheabhraigh dóibh laethanta sa Ghaeltacht.
Táthar ag súil go mbeidh an suíomh ina chomhartha ómóis dóibh siúd a chruthaigh agus a chothaigh Abair Amhrán, agus do gach duine a choinnigh na hamhráin beo. Beidh glúin nua anois in ann iad a chloisteáil, a fhoghlaim agus a cheol.