Tháinig 49 teaghlach Gaeilge ó gach cearn den tír le chéile i gCorca Dhuibhne, Co. Chiarraí, ar an 9 Lúnasa chun seachtain lán le spraoi, cairdeas agus imeachtaí trí Ghaeilge a chaitheamh le chéile.
Is é Teanga Tí, rannóg teaghlaigh Ghlór na nGael, a eagraíonn an tSaoire Ghaeltachta, ócáid bhliantúil a thugann deis do theaghlaigh Ghaeilge tréimhse a chaitheamh i dtimpeallacht nádúrtha lán-Ghaeilge. Bíonn an tsaoire ar siúl an dara seachtain de mhí Lúnasa gach bliain i gColáiste Íde lasmuigh den Daingean.
Bhí clár leathan imeachtaí ar fáil arís i mbliana, agus breis agus 35 imeacht curtha ar bun do dhaoine d’aoiseanna éagsúla. I measc na n-imeachtaí bhí surfáil, spraoi ar an trá, ceardlanna ealaíne, siúlóidí treoraithe, scileanna peile, tóraíocht taisce agus tráth na gceist, chomh maith le réimse gníomhaíochtaí eile cois farraige.