Agus Seachtain Náisiúnta na hOidhreachta faoi lán seoil, tá deis againn machnamh a dhéanamh ar an méid a thuigimid as an bhfocal ‘oidhreacht’. Is furasta smaoineamh ar chaisleáin, ar sheanfhoirgnimh agus ar shéadchomharthaí nuair a luaitear an téarma. Ach tá i bhfad níos mó i gceist. Cuimsíonn ár n-oidhreacht ár dteanga, ár dtírdhreach, ár mbéaloideas, ár gceol, ár logainmneacha agus na traidisiúin a thug glúin i ndiaidh glúine dúinn.
Tá neart cúiseanna ceiliúrtha againn. Bíonn suim mhór ag an bpobal i stair áitiúil agus in imeachtaí cultúrtha, agus tugann Seachtain Náisiúnta na hOidhreachta deis do dhaoine dul i dtaithí ar ghnéithe dá gceantar féin nach mbeadh ar eolas acu murach sin. Osclaítear doirse, eagraítear turais agus roinntear scéalta a chuireann lenár dtuiscint ar an áit as ar tháinig muid.
Ach ní leor seachtain amháin sa bhliain.