Tá comhlacht teicneolaíochta oideachais SúilSiar Teoranta, atá lonnaithe i gCeatharlach, tar éis leathnú suntasach a fhógairt ar a chuid oibre le béim ar fhorbairt intleachta saorga trí mheán na Gaeilge, tar éis dó an gradam don Smaoineamh Gnó is Nuálaí a bhuachan ag taispeántas New Frontiers de chuid Fhiontraíocht Éireann in SETU Phort Láirge.
Mar chuid den fhás sin, tá an comhlacht ag cruthú a chéad phoist inmheánaigh mar Fhorbróir Córas AI agus Forbróir Ginearálta. Beidh an ról lonnaithe i gCeatharlach agus díreoidh sé ar fhorbairt réiteach AI atá deartha go sonrach don Ghaeilge agus do mhionteangacha eile.
Grianghraf: Patrick Browne
Freastalaíonn SúilSiar ar iar-bhunscoileanna lán-Ghaeilge agus Gaeltachta trí acmhainní digiteacha teagaisc agus foghlama a chur ar fáil do gach ábhar meánscoile. I gcomhar le hOifig Fiontair Áitiúil Cheatharlach, tá an comhlacht ag forbairt buAIrcín, cúntóir AI do mhúinteoirí a bhfuil sé mar aidhm aige bearnaí sa tacaíocht dhigiteach don Ghaeilge a líonadh.
Ag labhairt dó tar éis an gradam a bhaint amach, dúirt Stiúrthóir Bainistíochta SúilSiar, Feargal Máirtín, gur thug clár New Frontiers “fuinneamh agus misneach” don chomhlacht. Dúirt sé freisin go gcuirfidh an maoiniú ó Oifig Fiontair Áitiúil Cheatharlach ar a gcumas post ardscileanna a chruthú agus leanúint dá misean réitigh nuálacha dhigiteacha a fhorbairt don ghaeloideachas.
Bhunaigh na múinteoirí Feargal Máirtín agus Emma Nic an Mhaoir SúilSiar in 2025. Tá os cionn 33% de na scoileanna lán-Ghaeilge agus Gaeltachta sa tír ag úsáid an ardáin cheana féin, agus meastar go mbeidh breis agus 5,000 scoláire cláraithe leis sa scoilbhliain atá romhainn.