Bhain Gaeil Fhanada craobh shóisir na bhfear de Chomórtas Peile na Gaeltachta den dara huair le cúig bliana anuas nuair a tháinig siad ar ais ó dheich gcúilín chun deiridh chun Tuar Mhic Éadaigh a shárú de shé chúilín i gcluiche ceannais den scoth i gCill Charthaigh Dé Luain.
Ag leath ama bhí cuma na maitheasa ar an bhfoireann ó Mhaigh Eo agus iad chun tosaigh 2-8 in éadan 0-4 tar éis taispeántas ceannasach sa chéad leath. Ach léirigh fir Fhánada spiorad, seasmhacht agus ardchaighdeán sa dara leath chun an cluiche a iompú bun os cionn agus an corn a thabhairt ar ais go Tír Chonaill.
Chuir Fánaid tús maith leis an gcluiche le cúilíní ó Phádraig Mac Giolla Chearra agus Oisín Ó Siadhail a d’fhág iad chun tosaigh go luath. Ach de réir mar a chuaigh an chéad leath ar aghaidh ghlac Tuar Mhic Éadaigh smacht ar imeachtaí.