Bhain Séamus Ó Frighil Gradam Cuimhneacháin Mhichíl Mhic Giolla Easpaig agus é tar éis a bheith ainmithe mar laoch na himeartha tar éis do Ghaeil Fhánada teacht ó dheich gcúilín chun deiridh le corn sóisir Chomórtas Peile na Gaeltachta a bhuachan i gCill Charthaigh Dé Luain.
Bhí muintir Fhánada faoi bhrú mór ag leath ama i gcoinne Thuar Mhic Éadaigh, ach léirigh siad misneach agus diongbháilteacht sa dara leath chun an cluiche a iompú ina bhfabhar agus an dara craobh a bhuachan laistigh de chúig bliana.
Ag labhairt dó le An Páipéar i ndiaidh an chluiche, mhol Ó Frighil an tionchar a bhí ag bainisteoirí agus ag ionadaithe na foirne.
“Bhí muid an-bhuartha ag leath ama agus sinn deich gcúilín taobh thiar. Shuigh muid síos sa tseomra feistis agus tháinig Christy Sweeney agus Paul Coyle isteach. Chuir siad misneach ar ais ionainn agus dúirt siad nach raibh an cluiche thart go fóill,” a dúirt sé.
D’admhaigh sé nach raibh cruinneas na foirne sách maith sa chéad leath ach gur tháinig feabhas suntasach orthu ina dhiaidh sin.
“Bhí ár ráta tiontaithe ró-íseal sa chéad leath. Bhí na seansanna againn ach níor thapaigh muid iad. Bhí tionchar ollmhór ag na himreoirí a tháinig isteach ón bhinse agus d’athraigh siad an cluiche.”
Bhí an bua níos speisialta fós de bharr gur reáchtáladh an comórtas i nDún na nGall, contae a bhí thar a bheith láidir i rith an deireadh seachtaine.
“Bhí deireadh seachtaine iontach ag clubanna Dhún na nGall. Bhí sé thar a bheith speisialta an chraobh seo a bhuachan anseo sa bhaile,” a dúirt sé.
Tá cúis eile cheiliúrtha ag Ó Frighil agus a bhean Emer agus iad ag súil lena gcéad pháiste sna míonna amach romhainn.
“Tá cúpla mí mhór romhainn agus cuireann an bua seo barr feabhais ar gach rud,” a dúirt sé, agus Gaeil Fhanada ag filleadh abhaile le corn eile agus cuimhní cinn den scoth ó Chomórtas Peile na Gaeltachta 2026.