Tá tús curtha cheana féin leis an obair ullmhúcháin do Chomórtas Peile na Gaeltachta 2027 i Lios Póil, agus de réir chathaoirleach an choiste eagraithe, Gabriel Ó Cathasaigh, beidh an pobal iomlán páirteach sa tionscadal mór a thabharfaidh na mílte cuairteoirí go Corca Dhuibhne an samhradh seo chugainn.
Ag labhairt dó le An Páipéar i ndiaidh chomórtas 2026 i gCill Charthaigh, dúirt Ó Cathasaigh gur fhág an deireadh seachtaine i nDún na nGall an-luí air agus gur thug sé léargas luachmhar don choiste i Lios Póil ar na dúshláin agus na deiseanna atá rompu.
“Bhí mé tógtha leis an eagrúchán agus leis an obair a rinneadh i gCill Charthaigh,” a dúirt sé. “Nuair a fheiceann tú an méid daoine a bhíonn ag obair taobh thiar de na cúrsaí, tuigeann tú gur iarracht phobail atá i gComórtas Peile na Gaeltachta.”