Tá Oireachtas na Gaeilge tar éis glaoch ar fhoilsitheoirí leabhar Gaeilge iarratais a chur isteach do Ghradaim Foilsitheoireachta 2026, a aithníonn sárchaighdeán agus barr feabhais in earnáil na foilsitheoireachta Gaeilge.
Bronnfar trí ghradam i mbliana. Is iad sin Gradam Réics Carló do Leabhar na Bliana don Léitheoir Óg, Gradam Uí Shúilleabháin do Leabhar na Bliana don Léitheoir Fásta, agus Gradam de Bhaldraithe do Leabhar na Bliana do Shaothar Aistrithe go Gaeilge ó theanga eile.
Tá cáil ar na gradaim mar cheann de na príomhaitheantais sa tionscal foilsitheoireachta Gaeilge agus meastar gur mór an onóir d’fhoilsitheoir, d’údar agus do chruthaitheoirí leabhar a bheith i measc na mbuaiteoirí. Bronnfar duaiseanna ar údair na saothar a éireoidh leo, agus i gcás Ghradam Réics Carló, gheobhaidh ealaíontóir an leabhair agus an teach foilsitheoireachta aitheantas chomh maith.
Tá duaischiste iomlán dar luach €17,000 á chur ar fáil do bhuaiteoirí na ngradaim i mbliana. Tá sé mar aidhm ag an scéim tacú le forbairt leanúnach na litríochta Gaeilge agus aitheantas poiblí a thabhairt don obair chruthaitheach atá ar bun ar fud na hearnála.
Tá an comórtas oscailte anois agus is féidir le foilsitheoirí a gcuid iarratas a chur isteach ar líne. Beidh deis acu saothair a foilsíodh le déanaí a chur faoi bhráid an phainéil mholtóireachta le haghaidh breithnithe.
Is é Déardaoin, an 16 Iúil 2026 ag 5.00pm, an spriocdháta deiridh le haghaidh iontrálacha.
Tá súil ag lucht eagraithe Oireachtas na Gaeilge go meallfaidh comórtas na bliana seo líon mór iarratas agus go léireoidh sé an saibhreas agus an éagsúlacht atá le fáil i bhfoilsitheoireacht na Gaeilge sa lá atá inniu ann.
Tá tuilleadh eolais agus foirm iarratais ar fáil ag https://www.surveymonkey.com/r/gradaimfoilsitheoireachta2026