Bhí súile na dtíortha Ceilteacha dírithe ar Bhéal Feirste an tseachtain seo le haghaidh na Fhéile na Meán Ceilteach. Ar feadh trí lá tháinig craoltóirí, iriseoirí, léiritheoirí, cruthaitheoirí ábhair agus mic léinn ó Éirinn, Albain, an Bhreatain Bheag, an Bhriotáin, Corn na Breataine agus Oileán Mhanann le chéile chun ceiliúradh a dhéanamh ar an saothar atá á dhéanamh trí mheán na dteangacha Ceilteacha.
Bhí tábhacht ar leith ag baint leis an bhféile i mbliana. In am ina bhfuil dúshláin mhóra roimh na meáin thraidisiúnta agus ina bhfuil athrú leanúnach ag teacht ar an mbealach a bhaigheann daoine a gcuid nuachta agus siamsaíochta, thug Féile na Meán Ceilteach deis luachmhar do dhaoine machnamh a dhéanamh ar thodhchaí na meán i bpobail mhionteangacha.
Ní hamháin gur ceiliúradh ar an obair a rinneadh go dtí seo a bhí ann, ach deis freisin féachaint chun cinn. Léiríodh go soiléir i rith na seachtaine go bhfuil borradh agus fuinneamh nua le sonrú sna meáin Cheilteacha. Tá glúin nua iriseoirí, podchraoltóirí, déantóirí scannán agus cruthaitheoirí ábhair ag teacht chun cinn, agus iad ag baint úsáide as ardáin nua chun a dteangacha agus a gcultúir a chur os comhair lucht féachana níos leithne ná riamh.
Bhí ról lárnach ag an nGaeilge sa bhféile. Léirigh líon agus caighdeán na n-iontrálacha ó Éirinn go bhfuil earnáil na meán Gaeilge ag leanúint de bheith ag forbairt, in ainneoin na ndúshlán a bhaineann le maoiniú, acmhainní agus iomaíocht ó mheáin idirnáisiúnta. Is ábhar misnigh é go bhfuil scéalta á n-insint againn fós inár dteanga féin agus go bhfuil lucht féachana sásta iad a leanúint.
Ba óstach den scoth í cathair Bhéal Feirste. Tá ról ceannródaíoch ag an gcathair le blianta beaga anuas i bhforbairt na Gaeilge agus na meán Gaeilge, agus ba léir an dul chun cinn sin i rith na féile. Chuir an fháilte a cuireadh roimh chuairteoirí agus an éagsúlacht imeachtaí a bhí ar fáil go mór le rath na hócáide.
Bhí deis ann chomh maith foghlaim ó thaithí na náisiún Ceilteach eile. Cé go bhfuil dúshláin éagsúla os comhair gach teanga, tá go leor cosúlachtaí idir na pobail seo agus tá neart le foghlaim óna chéile maidir le forbairt lucht féachana, úsáid na teicneolaíochta agus mealladh na nglúnta óga.
Agus an fhéile anois thart don bhliain seo, is fiú cuimhneamh nach faoi ghradaim ná faoi chomórtais amháin atá Féile na Meán Ceilteach. Is faoi phobal atá sí. Pobal atá tiomanta do na teangacha Ceilteacha a choinneáil beo, ábhartha agus láidir sa saol nua-aimseartha. Má bhí teachtaireacht amháin le baint as an tseachtain i mBéal Feirste, is é seo í: tá todhchaí gheal fós ag na meáin Cheilteacha, fad is atá daoine sásta a scéalta a insint agus a dteangacha a úsáid le bród.