Nuair a thit an cuirtín ar Chomórtas Peile na Gaeltachta 2026 tráthnóna Dé Luain, bhí tuirse ar go leor daoine, ach bhí sásamh, bród agus mothú éachta le brath i measc mhuintir Chill Charthaigh. Tar éis míonna fada ullmhúcháin, cruinnithe agus d’obair dheonach, d’éirigh le CLG Chill Charthaigh deireadh seachtaine a chur ar fáil a fhanfaidh i gcuimhne na ndaoine go ceann i bhfad.
Tá Comórtas Peile na Gaeltachta ar cheann de na himeachtaí is speisialta i bhféilire CLG na tíre. Ní hamháin gur féile spóirt í, ach is ceiliúradh í ar an nGaeilge, ar an gcultúr agus ar an gcairdeas idir clubanna Gaeltachta ó cheann ceann na tíre. Bhí na tréithe sin go léir le sonrú i gCill Charthaigh an deireadh seachtaine seo caite.
Ar an bpáirc imeartha ba le Dún na nGall an deireadh seachtaine gan aon agó. Rug Conallaigh na craobhacha léir leo: Gaoth Dobhair, an Tearmann, Naomh Columba, Gaeil Fhánada agus Cill Charthaigh. Léiriú eile a bhí ann ar neart na peile Gaeltachta sa chontae agus chuir sé ábhar mór ceiliúrtha ar fáil do lucht tacaíochta Dhún na nGall.