Beidh pobal LADTAIÉ+ na Gaeilge ag teacht le chéile i mBaile Átha Cliath an deireadh seachtaine seo mar chuid de Bhál Aiteach 2026, imeacht a cheiliúrann cruthaitheacht, féiniúlacht agus an Ghaeilge i dtimpeallacht chairdiúil thacúil.
Reáchtálfar an ócáid i dteach tábhairne Mhic Reachtain ar Lána Mhic Liam oíche Dé Sathairn, an 20 Meitheamh, ó 6 go 11 . Is iad AerachAiteachGaelach (AAG) agus Queercal Comhrá atá ag eagrú an imeachta, a bhfuil cáil bainte amach aige le blianta beaga anuas mar cheann de na hócáidí is mó do phobal aiteach na Gaeilge.
Cuirfear tús leis an tráthnóna le cluichí agus gníomhaíochtaí sóisialta chun deis a thabhairt do dhaoine aithne a chur ar a chéile. Ina dhiaidh sin, beidh an bál mór faoi stiúir na banríona draig Anna Ard.
Beidh deis ag rannpháirtithe páirt a ghlacadh i gcomórtas feistis, le ceithre chatagóir éagsúla á gcur ar fáil: “Gráinne Seodra”, “Táimse i mo Chulaith”, “Tiocfaidh ár mBláth” agus “Seo mo Spás”. Bronnfar duaiseanna ar luach €100 ar na buaiteoirí i ngach rannóg. Roghnófar na duaiseanna ó eolaire Údarás na Gaeltachta, rud a thacóidh le gnólachtaí agus seirbhísí sna ceantair Ghaeltachta.
Mar chuid den imeacht freisin, seolfar an leagan Gaeilge den úrscéal grafach Heartstopper 3, atá aistrithe ag Stiúrthóir AAG, Eoin Mc Evoy.
Deir na heagraithe gur ócáid spraíúil, chuimsitheach é an Bhál Aiteach a thugann deis do dhaoine an Ghaeilge agus a bhféiniúlacht a cheiliúradh le chéile. Tá ticéid ar fáil ar Eventbrite agus tá lascaine 50 faoin gcéad á tairiscint do bhaill d’AerachAiteachGaelach.
Tá AerachAiteachGaelach agus Queercal Comhrá tar éis buíochas a ghabháil leis an gCiste Spreagtha agus le Foras na Gaeilge as an tacaíocht a chuir siad ar fáil chun an imeacht a reáchtáil.