Tá brón mór léirithe ag pobal na camógaíochta agus na gcluichí Gaelacha i ndiaidh bhás iaruachtarán den Chumann Camógaíochta, Liz Howard.
Chaith Liz Howard na blianta fada ag freastal ar an gCumann Camógaíochta agus ag cur an spóirt chun cinn ag leibhéal club, contae agus náisiúnta. Ba í an chéad bhean as Tiobraid Árann a toghadh ina huachtarán ar an gCumann in 2006.
Rugadh í i gCarraig na Siúire i gclann a raibh cáil mhór orthu i saol na gcluichí Gaelacha. Bhuaigh a hathair, Garrett Howard, boinn iomána uile-Éireann le Luimneach agus le Baile Átha Cliath. Níos déanaí, bhog an teaghlach go Contae an Chláir agus bhí siad páirteach i mbunú chlub camógaíochta na Fiacaile.
Mar imreoir, d’imir Liz leis an bhFiacail, Ros Cré, Cnoc Sheaghaine, Celtic agus Phoenix. Bhuaigh sí bonn den tSraith Náisiúnta Shinsearach le Tiobraid Árann agus bonn sóisearach uile-Éireann le Baile Átha Cliath.
Ceapadh í ina hOifigeach Caidrimh Phoiblí Náisiúnta leis an gCumann Camógaíochta i 1979, agus idir 1981 agus 2003 bhí sí ina hOifigeach Caidrimh Phoiblí le CLG Thiobraid Árann. Bhí sí ar an gcéad bhean freisin a bhí ina hanailísí ar chlár RTÉ, The Sunday Game.
Bhí ról lárnach aici i gceiliúradh céad bliain an Chumainn Camógaíochta in 2004 agus lean sí uirthi ag obair ar son an spóirt ar feadh a saoil.
Dúirt Uachtarán an Chumainn Camógaíochta, Brian Molloy, gur fhág Liz Howard lorg mór ar an gcamógaíocht agus ar spórt na mban in Éirinn.
“Ar dheis Dé go raibh a hanam dílis,” a dúirt sé.