Tá cúrsa nua ar líne seolta ag RTÉ dar teideal Cúpla Focal a bhfuil sé mar aidhm aige cabhrú le daoine a gcuid Gaeilge a athfhoghlaim agus a muinín sa teanga a fhorbairt arís. Is cúrsa saor in aisce é seo a mhaireann ar feadh seacht seachtaine agus a chuirtear ar fáil i bhfoirm nuachtlitreach sheachtainiúil.
Tá an cúrsa á stiúradh ag an múinteoir agus údar Sarah Murphy (@MuinteoirMurphy ar Instagram), a threoraíonn rannpháirtithe gach seachtain trí cheachtanna simplí a mhíníonn bunstruchtúr na teanga agus a thugann dúshláin phraiticiúla dóibh a gcuid Gaeilge a úsáid ina saol laethúil. Gheobhaidh síntiúsóirí ríomhphost amháin gach seachtain le linn an chúrsa, ina mbeidh cleachtaí éasca agus spreagúla.
Ag labhairt di faoin tionscnamh, dúirt Murphy “B’fhéidir go bhfuil do chuid Gaeilge beagáinín meirgeach nó go gceapann tú gur chaill tú í ar fad, ach tá sí agat fós agus is leatsa an teanga. Tá muinín fíorthábhachtach agus táimid ag iarraidh an mhuinín sin a chothú i ndaoine.” Chuir sí béim freisin ar an tábhacht a bhaineann le botúin a dhéanamh mar chuid den fhoghlaim, ag rá go bhfuil siad “ag súil leo agus go gcuirtear fáilte rompu fiú”. Molann sí do dhaoine an cúrsa a dhéanamh in éineacht le duine eile más féidir, chun níos mó deiseanna comhrá agus cleachtaidh a chruthú.
Luaigh Siún Ní Dhuinn, Comhordaitheoir Digiteach Gaeilge le RTÉ, go bhfuil an tionscnamh ag freagairt d’éileamh soiléir ón bpobal, ag rá, “Deis iontach é Cúpla Focal dóibh siúd a bhfuil spéis acu sa Ghaeilge. Aithníonn RTÉ go bhfuil éileamh nach beag ar ábhar d’fhoghlaimeoirí na teanga agus ba mhaith le RTÉ freastal ar an éileamh sin, ar bhealach a oireann do dhaoine, trí chúrsa saor in aisce, digiteach i bhfoirm nuachtlitreach.”
Moltar do rannpháirtithe loga foghlama a choinneáil chun dul chun cinn a thaifeadadh agus stór focal nua a bhailiú. Ina theannta sin, cuirfear “Dúshlán na Seachtaine” ar fáil gach seachtain, rud a spreagfaidh daoine an Ghaeilge a úsáid go nádúrtha i gcomhthéacsanna laethúla.
Tar éis na seacht seachtaine, leanfaidh rannpháirtithe de nuashonruithe a fháil ó RTÉ Gaeilge, rud a chabhróidh leo fanacht gníomhach leis an teanga.
Tá an chéad cheacht le seoladh Dé Domhnaigh seo chugainn, agus deirtear gur céim thábhachtach é clárú don nuachtlitir i dtreo athcheangal leis an nGaeilge. Is féidir clárú don chúrsa ar líne ag www.rte.ie/gaeilge.