Tháinig na sonraí chun solais i bhfreagra ar cheist ón Chomhalta den Tionól Reachtach Gerry Carroll
De réir figiúirí a tháinig chun solais an tseachtain seo, bhain Seirbhís Póilíneachta Thuaisceart Éireann (SPTÉ) úsáid as bogearraí aghaidh-aitheanta conspóideacha níos mó ná 2,000 uair ó mhí na Samhna 2021.
Chuir Gerry Carroll, comhalta den tionól reachtach de chuid Phobal seachas Brabús, ceist ar an Aire Dlí agus Cirt cé mhéad uair a baineadh úsáid as an áis aghaidh-aitheanta i mbunachar sonraí na bpóilíní.
Scríobh Naomi Long a freagra ag deimhniú gur bhain SPTÉ úsáid as 2,153 uair ó mhí na Samhna 2021.
Is córas comhroinnte eolais é bunachar sonraí na bpóilíní in Oifig Gnóthaí Baile an rialtais.
Tá cáineadh déanta ar an chóras ag roinnt grúpaí, agus tháinig sé chun solais i mí na Nollag go raibh an córas aghaidh-aitheanta atá in úsáid claonta in aghaidh ban, daoine óga, agus baill de ghrúpaí mionlach eitneach.