Tabharfar faoi cheann de na finscéalta is cáiliúla i mbéaloideas na hÉireann i gclár faisnéise nua, Cill Stuifín, a chraolfar ar TG4 Dé Máirt, an 13 Deireadh Fómhair, ag 9.30 pm.
De réir an tseanchais bhí sráidbhaile darb ainm Cill Stuifín suite amach ó chósta an Chláir tráth, sular shlog an tAigéan Atlantach é. Tá míniúcháin éagsúla tugtha ar a imeacht leis na céadta blianta, idir mhaidhm bháite agus mhallacht a cuireadh ar an áit.
Sa chlár nua, tabharfaidh an béaloideasóir Aindrias de Staic faoi rúndiamhair an tsráidbhaile a fhiosrú, agus é ag leanúint den obair thaighde a rinne a athair nach maireann.
Agus béaloideas agus eolaíocht á dtabhairt le chéile, féachfar le fáil amach an bhfuil bunús stairiúil leis an bhfinscéal agus an bhféadfadh tubaiste nádúrtha a bheith taobh thiar de.