Is é an tuiseal ginideach foirm ghramadúil d’ainmfhocal a thagann faoi anáil focail eile agus a léiríonn tríd an bhfoirm sin an tionchar atá ag an bhfocal eile air nó an gaol atá eatarthu. Seo roinnt samplaí ó An Foclóir Beag (An Gúm):
- teach an tsagairt – tá an focal sagart sa tuiseal ginideach, ag léiriú gur leis an sagart an teach
- muintir na tíre – tá an focal tír sa tuiseal ginideach, ag léiriú gur leis an tír an mhuintir
- lucht leanúna – tá leanúint sa tuiseal ginideach, ag léiriú cén sórt lucht, nó daoine, atá i gceist
Bíonn ainmfhocal sa tuiseal ginideach díreach tar éis ainm briathartha, mura bhfuil eisceacht i gceist:
| ag ól dí | ag ithe úill | ag ciceáil liathróide |
| ag léamh leabhair | ag scríobh ailt | ag briseadh na fuinneoige |
| ag péinteáil an dorais | ag sárú na treorach | ag ní an chairr |
Bíonn ainmfhocal sa tuiseal ginideach díreach tar éis réamhfhocal comhshuite, mura bhfuil eisceacht i gceist:
| ar chúl an tí | i gcomhair an lae | ar feadh na hoíche |
| ar fud na tíre | i láthair an Uachtaráin | i measc an tslua |
| ar son na cúise | in aice na leapa | i ndiaidh dinnéara |
| ar bharr an vardrúis | i gceann míosa | os cionn an dorais |
| go ceann leathuaire | le linn an chogaidh | tar éis na hóráide |
Bíonn focail sa tuiseal ginideach tar éis na réamhfhocal seo:
| chun na scoile | dála an scéil | trasna na habhann | cois locha |
Tá bealaí éagsúla ann chun focal a chur sa tuiseal ginideach. Tá gach ainmfhocal Gaeilge i gceann amháin de chúig ghrúpa. Na díochlaontaí a thugtar ar na grúpaí seo. Is é an chaoi a ndéantar an tuiseal ginideach uatha d’ainmfhocal a shocraíonn cén díochlaonadh lena mbaineann an t-ainmfhocal sin. Breathnóimid ar na díochlaontaí sna seachtainí beaga seo romhainn.