Is í Uachtarán na hÉireann, Catherine Connolly, a dhéanfaidh oscailt oifigiúil Oireachtas na Samhna i gCill Airne i mbliana. Is ócáid shuntasach seo do phobal na Gaeilge agus deis eile chun saibhreas ár dteanga, ár gceoil agus ár gcultúir a cheiliúradh. Ní hamháin gur féile é an tOireachtas, ach cruinniú mór na nGael, áit a neartaítear cairdeas agus a spreagtar glúnta nua.
Ó bunaíodh an tOireachtas in 1897 tá sé ar cheann de na clocha coirnéil i saol cultúrtha na Gaeilge. Féile bheag a bhí ann i dtosach, ach d’fhás sé ina cheiliúradh náisiúnta ar an amhránaíocht ar an sean-nós, ar an damhsa, ar an litríocht agus ar an scéalaíocht. In ainneoin na ndúshlán a bhí roimh an teanga le himeacht na mblianta, lean an fhéile uirthi ag forbairt.
Léirigh rath Oireachtas na Samhna i mBéal Feirste anuraidh gur féidir leis an bhféile pobail éagsúla a thabhairt le chéile agus beocht nua a spreagadh. Bhí sé tábhachtach go háirithe go raibh an Ghaeilge chomh feiceálach sin i gcathair a bhfuil a pobal Gaeilge ag dul ó neart go neart.