Aon chailín déag atá sa chór, idir rang a dó agus rang a cúig, agus thug siad léiriú spleodrach ar dhá amhrán thraidisiúnta, Sé mo Laoch agus Óró, Sé do Bheatha ’Bhaile, agus an bodhrán á úsáid acu sa dara hamhrán.
Tháinig Cór Scoil Náisiúnta Chillín Liath, Contae Chiarraí, sa dara háit, tar éis dóibh dhá amhrán a chanadh freisin. Bhí buachaillí agus cailíní páirteach sa chór sin. Ní raibh an tríú cór a bhí le bheith san iomaíocht in ann freastal ar an gcomórtas.
Ba iad Colm Ó Foghlú agus Dominic Mac Giolla Bhríde moltóirí an chomórtais, agus bhí Muireann Ní Laoire ina bean an tí. Ba é Stiofán Ó Móráin, Cathaoirleach an Oireachtais, a d’fhógair na torthaí agus bronnadh teastais ar na rannpháirtithe.
Ag labhairt le An Páipéar i ndiaidh an chomórtais, dúirt Laura Cahillane, múinteoir ceoil an chóir bhuaitigh, go raibh obair mhór déanta ag na cailíní agus go raibh an-suim acu sa cheol traidisiúnta.