Céim ar gcúl don Aontas Eorpach ba ea toradh reifreann na hÍoslainne i dtaobh cainteanna a chur sa siúl arís maidir le ballraíocht san Aontas.
Dhiúltaigh na vótálaithe 52.8% in aghaidh 47.2% do mholadh an rialtais cainteanna faoi bhallraíocht a thosú arís.
Bhí cleas soiléir ag an rialtas sa chaoi ar chuir siad an moladh le chéile, mar bhí sé intuigthe ón tús go mbeadh reifreann eile ann i dtaobh aon socrú ballraíochta a thiocfadh as cainteanna. Cé a bheadh i gcoinne cainteanna oscailte gan réamhchoinníoll ar bith ar mhaithe le heolas a fháil faoin socrú a d’fhéadfadh a bheith ann?
Níor shlog pobal na hÍoslainne é beag ná mór.
Is sa phríomhchathair, Réicivíc, amháin a bhí móramh ann don mholadh, i measc lucht airgeadais agus riaracháin, ach bhí an vóta sin báite ag vótaí ón muintir faoin tuath. Deirtear gur vótáil 90% de lucht iascaireachta na tíre i gcoinne an rúin.