Grianghraif: Michael McLaughlin
Tá iarratais á lorg ó mhná i gceantair Ghaeltachta ar mian leo gnó nua a thosú nó gnólacht óg a fhorbairt le haghaidh Cumasú Tús, clár fiontraíochta saor in aisce a mhairfidh dhá sheachtain déag.
Tá an clár á mhaoiniú ag Údarás na Gaeltachta agus á sheachadadh ag Moil Nuálaíochta Ollscoil Teicneolaíochta an Atlantaigh agus Ionad Rubicon in Ollscoil Teicneolaíochta na Mumhan.
Cuirfear an cúrsa ar fáil ar líne, ach beidh deiseanna ag na rannpháirtithe freisin páirt a ghlacadh i seisiúin mheantóireachta aonair agus in imeachtaí líonraithe i bpearsan. Díreofar ar réimsí tábhachtacha gnó amhail ceannaireacht, cumarsáid, caidreamh custaiméara, réiteach fadhbanna agus ioncam a chruthú trí dhíolacháin.
Is é príomhaidhm Cumasú Tús tuilleadh deiseanna a chruthú do bhanfhiontraithe sa Ghaeltacht agus an mhuinín agus na scileanna a thabhairt dóibh chun deiseanna forbartha gnó a thapú. Gheobhaidh na rannpháirtithe tacaíocht maidir leis na céimeanna a bhaineann le comhlacht a bhunú agus plean gnó a fhorbairt.
Dúirt Susan Ní Churnáin, Oifigeach Oiliúna agus Oideachais le hÚdarás na Gaeltachta, go bhfuil an clár ag dul ó neart go neart ó seoladh é in 2024.
“Is iontach na smaointe agus an tallann atá ag mná Gaeltachta a fheiceáil ag forbairt leis an tacaíocht a chuireann Cumasú ar fáil dóibh ina ngnóthaí éagsúla,” a dúirt sí.
Dar léi, ní hamháin go gcabhraíonn an clár le mná gnólachtaí rathúla a fhorbairt, ach téann sé chun tairbhe don gheilleagar áitiúil agus náisiúnta freisin, agus tá roinnt táirgí agus seirbhísí á ndíol ar fud na hÉireann agus thar lear.
Dúirt Laura Martyn, úinéir Dara Mats agus iar-rannpháirtí sa chlár, nach raibh aon chúlra aici i gcúrsaí gnó sular ghlac sí páirt ann.
“Bhí sé iontach an cúnamh agus an treoir a fháil chun mo phaisean a iompú ina shlí bheatha,” a dúirt sí. Mhol sí go háirithe an deis a fuair sí aithne a chur ar mhná eile ón nGaeltacht agus foghlaim uathu.
Tá Cumasú Tús oscailte do mhná a bhfuil smaoineamh gnó acu nó atá i mbun gnó le suas le 18 mí. Caithfidh iarratasóirí a bheith lonnaithe i nGaeltacht Mhaigh Eo, na Gaillimhe, Dhún na nGall, Chiarraí, Chorcaí, na Mí nó Phort Láirge.
Is é an 4 Meán Fómhair 2026 an spriocdháta d’iarratais. Is féidir clárú ar shuíomh Empower Cumasú nó tuilleadh eolais a fháil trí ríomhphost a chur chuig empower.galwaymayo@atu.ie.