Grianghraf: James Crombie
Bhailigh na mílte duine ar fud na hÉireann tráthnóna Dé Céadaoin chun radharc a fháil ar urú gréine a raibh cur síos déanta air mar cheann de na himeachtaí réalteolaíochta ba spreagúla le blianta fada.
Ba é seo an t-urú gréine ba shuntasaí a bhí le feiceáil sa chuid seo den Domhan ó 1999, agus tháinig na mílte faireoir spéire le chéile ag imeachtaí in áiteanna éagsúla sa tír, ina measc Corcaigh, Baile Átha Cliath, Ard Mhacha, Gaillimh, Maigh Eo agus Luimneach.
Bhí na milliúin duine ar fud Iarthar na hEorpa ag faire ar an spéir freisin agus bhí an t-ádh ar dhaoine san Íoslainn agus sa Spáinn éiclips iomlán gréine a fheiceáil.
Roghnaíodh Corcaigh mar phríomhionad na hÉireann don ócáid agus tháinig na mílte duine chuig Réadlann Chaisleán na Carraige Duibhe agus chuig bruacha na Laoi. Níor oibrigh an aimsir leo, áfach, agus chuir scamall trom isteach go mór ar an radharc.
Thart ar a 7.15 san iarnóin, nuair a bhí 96% den ghrian clúdaithe ag an ngealach agus an t-urú ag a bhuaic i gCorcaigh, ní raibh mórán den spéir le feiceáil.
Mar sin féin, bhí tionchar an uraithe soiléir. Thit an teocht go tapa, d’éirigh sé i bhfad níos dorcha taobh istigh de thréimhse an-ghearr agus tugadh athrú faoi deara in iompar na n-éan agus an fiadhúlra áitiúil.
Tháinig na mílte duine chuig Réadlann Chaisleán na Carraige Duibhe i gCorcaigh agus gur fhág go leor acu sásta ainneoin nach raibh an radharc a bhí súil acu leis acu.
Bhí atmaisféar maith i measc an tslua chomh maith. Dúirt duine amháin go raibh “an-chraic” ann agus go raibh atmaisféar iontach sa cheantar mar gheall ar an oiread sin daoine a bheith tagtha amach don ócáid.
Bhí cuairteoirí idirnáisiúnta i measc an tslua freisin. Dúirt duine amháin gur eitil siad ó Toronto go Baile Átha Cliath sular thug siad turas bus trí huaire go Corcaigh chun an t-urú gréine a fheiceáil.
Bhí an aimsir ní b’fhearr i bPáirc an Fhionnuisce i mBaile Átha Cliath, áit a raibh ceann de na mórán imeachtaí féachana a reáchtáladh ar fud na tíre ar siúl.
Bhain daoine úsáid as spéaclaí speisialta chun breathnú ar an urú go sábháilte. Chuir duine amháin síos ar an méid a bhí le feiceáil mar rud a bhí cosúil le “gealach chorránach, ach gurbh í an ghrian a bhí ann.”
Bhí ceiliúradh mór ar siúl ag Réadlann Ard Mhacha freisin, áit ar bhailigh na céadta duine. Chuir foireann na réadlainne teileascóip speisialta ar fáil agus dáileadh 400 péire spéaclaí cosanta ar an bpobal.
Bhí imní ann ar feadh tamaill díreach roimh bhuaic an uraithe nuair a tháinig scamall os comhair na gréine. Ghlan an scamall in am, áfach, agus fuair an slua radharc soiléir ar an ócáid.
Tháinig daoine ó gach cearn de na Sé Chontae go hArd Mhacha, chomh maith le cuairteoirí ó Lú, Baile Átha Cliath, Gaillimh agus áiteanna eile. Bhí lucht saoire ón bhFrainc agus ón nGearmáin i láthair chomh maith.
“Bhí sé thar cinn,” a dúirt duine a bhí i láthair. “Tháinig an pobal ar fad amach chun taitneamh a bhaint as.”
Dúirt cuairteoir eile gur rud suntasach a bhí ann an chaoi ar athraigh an solas le linn an uraithe. “Ní raibh sé dorcha ar fad, ach d’éirigh sé i bhfad níos dorcha. Bhí sé ar fheabhas.”
Grianghraf: Siobhain Grogan
Lasmuigh d’Éirinn, bhí an ócáid níos suntasaí fós in áiteanna áirithe. Chonacthas urú iomlán gréine ó Réicivíc san Íoslainn den chéad uair ó 1433 agus sa Spáinn, ba é an chéad urú iomlán gréine a bhí le feiceáil sa tír ó 1905.
Cé gur fhág an scamall roinnt díomá ina dhiaidh i gCorcaigh, ba ócáid annamh í a mheall sluaite móra amach ar fud na tíre agus a thug deis dóibh ceann de mhór-radhairc na réalteolaíochta a fheiceáil.
Beidh orthu fanacht tamall fada leis an gcéad deis eile den chineál céanna, áfach. Ní bheidh urú iomlán gréine eile le feiceáil sa tír go dtí 2090.