Beidh ar shiopadóirí in Éirinn táillí breise a íoc ar earraí a cheannaítear ar líne ó thíortha lasmuigh den Aontas Eorpach, agus tá An Post ag lorg soiléireachta maidir leis na rialacha nua atá beartaithe.
Tá sé beartaithe táille láimhseála €2 a ghearradh ar earraí a thagann isteach san Aontas Eorpach ó thíortha nach bhfuil ina mbaill den AE. Bheadh an táille sin sa bhreis ar an muirear custaim nua €3 atá i bhfeidhm ón 1 Iúil ar earraí áirithe a cheannaítear lasmuigh den Aontas.
D’fhéadfadh sé sin costas breise €5 a chur ar roinnt ceannachán ar líne. Níl sé soiléir fós, áfach, an ngearrfar an táille €2 ar gach beartán nó ar gach earra aonair atá istigh ann, rud a d’fhéadfadh difear suntasach a dhéanamh don chostas deiridh do thomhaltóirí.
Is ar An Post a bheidh an cúram na táillí a chur i bhfeidhm in Éirinn. Dúirt an comhlacht go bhfuil sé ag fanacht le tuilleadh soiléireachta faoin gcóras nua agus go dtuigeann sé go bhféadfadh táille riaracháin €2 teacht i bhfeidhm i mí na Samhna.
Is iad na Coimisinéirí Ioncaim a chuirfidh an muirear i bhfeidhm sa Stát nuair a bheidh comhaontú iomlán bainte amach idir ballstáit an Aontais Eorpaigh.
De réir na gCoimisinéirí Ioncaim, tabharfar an táille láimhseála atá beartaithe isteach faoin gCód Custaim nua de chuid an Aontais. Beidh sí ar leithligh ó dhleacht chustaim agus tá sé i gceist go gcabhróidh sí leis na costais a bhaineann le próiseáil chustaim a chlúdach.
Níor socraíodh go fóill méid deiridh na táille ná an dáta cruinn a thiocfaidh sí i bhfeidhm i bhfómhar 2026. Beidh na ceisteanna sin á bplé idir na ballstáit agus an Coimisiún Eorpach sna seachtainí amach romhainn.
D’fhéadfadh na hathruithe dul i bhfeidhm go háirithe ar shiopadóirí a cheannaíonn earraí go rialta ó mhiondíoltóirí atá lonnaithe lasmuigh den AE.