Fuair Dáithí Mac Gabhann croí úr i ndiaidh dó fanacht 8 mbliana ar an liosta trasphlandaithe.
Thug foireann na hotharlainne bualadh bos don leaid óg agus é ag imeacht ó Otharlann Freeman in Newcastle, Sasana.
Rugadh Dáithí in 2016 le siondróm hipeapláiseach croí clé, a chiallaíonn nár fhorbair an taobh clé dá chroí mar is ceart.
Dúirt teaghlach Dháithí ar na meáin shóisialta gur imigh Dáithí ó Bharda 23 leis an bhronntanas is fearr riamh — is é sin bronntanas saoil, agus bronntanas croí úir.
In ainneoin a aoise, tá an oiread sin bainte amach ag Dáithí. Bhí Dáithí agus a theaghlach ag feachtasaíocht ar feadh na mblianta chun na rialacha maidir le deonú orgán a athrú. Tháinig Dlí Dháithí i bhfeidhm ó Mheitheamh 2023, a chiallaíonn go bhfuil polasaí rogha an diúltaithe i bhfeidhm in áit polasaí ina roghnaíonn daoine a bheith páirteach ann.
Ar a bharr sin, fuair Dáithí saoirse na cathrach i mBéal Feirste i Meitheamh 2023, chun aitheantas a thabhairt dó as an fheachtas agus an tionchar a imríonn siad ar phobail na Sé Chontae.
Tá an-bhaint ag teaghlach Mhic Gabhann le pobal na Gaeilge fosta. Agus an tOireachtas ar siúl i mBéal Feirste anuraidh, bronnadh gradam speisialta an Oireachtais ar an teaghlach agus ar Dháithí mar gheall ar an éacht a bhain siad amach leis an fheachtas.
Bhuaigh an feachtas #IsDeontóirMé, gradam le haghaidh Fheachtas Meán Sóisialta na Bliana in 2020, ach ní raibh siad ann de bharr Covid-19.
Dúirt athair Dháithí, Máirtín, go bhfuil dóchas air gur tús aistear dochreidte é seo dá mhac. Dúirt sé fosta go raibh rud amháin soiléir nuair a tháinig sé ar ais ón trasphlandú, agus ba é sin go raibh dath ar a bheola agus teocht i mbarr a bhall coirp.
Fanfaidh Dáithí in Newcastle go ceann trí seachtaine eile sula dtiocfaidh sé abhaile.