Beidh clár nua irise seachtainiúil, Beo Beoga, le cloisteáil ar Raidió na Life ó inniú Dé hAoine, 7 Lúnasa, agus é mar aidhm aige tús spleodrach a chur leis an deireadh seachtaine do lucht éisteachta an stáisiúin. Craolfar an clár gach maidin Aoine idir 9r.n. agus 10r.n., agus is í Emer Nic Róibín a bheidh ina príomhláithreoir, agus láithreoirí éagsúla ag teacht léi ó sheachtain go seachtain.
Beidh réimse leathan ábhar mar chuid den chlár nua, lena n-áirítear scannáin, seirbhísí sruthaithe, imeachtaí sóisialta, cúrsaí siamsaíochta, ceol, teicneolaíocht agus popchultúr. Tá sé i gceist ag an stáisiún ardán a chur ar fáil do ghuthanna nua chomh maith, rud a chuirfidh le héagsúlacht agus le beocht sceideal Raidió na Life.
Dúirt Bainisteoir Forbartha agus Oiliúna Raidió na Life, Judy-Meg Ní Chinnéide, gur chreid sí go raibh deis ann irischlár beo a chur ar fáil a chuirfeadh tús fuinniúil leis an deireadh seachtaine. Dar léi, beidh meascán leathan ábhar ar fáil d’éisteoirí gach Aoine agus tá an stáisiún ag súil go mór le deis a thabhairt do láithreoirí nua agus le cur leis an sceideal eicléictiúil atá ar fáil cheana féin.
Ní hamháin sin, ach beidh comórtais rialta mar chuid den chlár freisin. Beidh duaiseanna éagsúla, lena n-áirítear t-léinte Raidió na Life agus bronntanais eile, le buachan ag éisteoirí le linn an chraolta.
Tá an tsraith nua á maoiniú trí scéim Fuaim agus Fís de chuid Choimisiún na Meán, a fhaigheann tacaíocht ón táille ceadúnais teilifíse. Tá an scéim dírithe ar ábhar nua craoltóireachta a chur ar fáil do lucht féachana agus éisteachta ar fud na tíre.
Tá Raidió na Life ag craoladh ó 1993 agus tá sé ar cheann de na stáisiúin raidió pobail Ghaeilge is mó tionchar sa tír. Soláthraíonn sé seirbhís do mhórcheantar Átha Cliath agus don phobal Gaeilge níos leithne ar líne, le tacaíocht ó Fhoras na Gaeilge. Cé nach bhfuil ach seisear fostaithe lánaimseartha agus beirt pháirtaimseartha ag an stáisiún, bíonn idir 100 agus 150 craoltóir deonach páirteach ann gach seachtain.
Thar na blianta, fuair na mílte craoltóir a gcéad taithí ar an aerthonn le Raidió na Life, ina measc Sharon Ní Bheoláin, Sinéad Crowley, Cormac Ó hEadhra, an Dr Aoibhinn Ní Shúilleabháin, Aedín Gormley, Colm Ó Mongáin agus Fachtna Ó Drisceoil. Tá cáil bainte amach ag an stáisiún as a chláir chainte ardchaighdeáin agus as a mheascán eicléictiúil ceoil, agus táthar ag súil go gcuirfidh Beo Beoga leis an traidisiún sin.
Tá Raidió na Life ar fail ar 106.4fm thar mórcheantar Baile Átha Cliath agus Cuige Laighean agus ar líne ar fud an domhain ag www.raidionalife.ie