Grianghraf: NW NewsPix
Tá 19 ball foirne de chuid Chomhairle Contae Dhún na nGall tar éis scoláireachtaí Gaeilge a bhaint amach mar chuid de scéim nua atá dírithe ar chumas Gaeilge na foirne a neartú agus ar oibleagáidí teanga na Comhairle a chomhlíonadh.
Bunaíodh Scéim Scoláireachta Gaeilge na Comhairle mar fhreagairt ar na dualgais atá leagtha amach in Acht na dTeangacha Oifigiúla (Leasú), 2021. Tá sé mar aidhm ag an scéim deis a thabhairt do bhaill foirne seachtain a chaitheamh sa Ghaeltacht i nDún na nGall chun freastal ar chúrsaí Gaeilge agus ar imeachtaí cultúrtha a chuirfidh lena gcumas teanga.
Bronnadh na scoláireachtaí ag searmanas i dTeach an Chontae, Leifear, maidin Dé Máirt, an 7 Iúil. Ba iad an Leas-Chathaoirleach, an Comhairleoir Terry Crossan, agus Leas-Chathaoirleach Choiste na Gaeilge, an Comhairleoir Martin Scanlon, a bhronn na scoláireachtaí ar na hiarrthóirí rathúla.
Dúirt an Comhairleoir Terry Crossan gur pribhléid dó na scoláireachtaí a bhronnadh agus rinne sé comhghairdeas leis na faighteoirí uile. Mhol sé an Chomhairle as an tionscnamh agus dúirt sé gur léiriú é ar an tiomantas atá aici don Ghaeilge agus dá cur chun cinn.
Chuir an Comhairleoir Martin Scanlon béim ar an tábhacht a bhaineann leis an scéim, go háirithe agus brú á chur ar phobail Ghaeltachta agus ar úsáid na Gaeilge. Dar leis, cabhróidh an tréimhse sa Ghaeltacht le muinín na foirne a fhorbairt agus cuirfidh sí le húsáid na Gaeilge ina gcuid oibre laethúla.
Freastalóidh na scoláirí ar chúrsa seachtaine le hOideas Gael i nGleann Fhinne ag deireadh mhí Iúil agus tús mhí Lúnasa. Beidh ranganna Gaeilge agus imeachtaí cultúrtha mar chuid den chlár, rud a thabharfaidh deis dóibh tuiscint níos doimhne a fháil ar an teanga agus ar an gcultúr.
Mar chuid den scéim, beidh ar na rannpháirtithe gealltanas a thabhairt go gcríochnóidh siad an cúrsa agus go mbainfidh siad úsáid as an nGaeilge ina gcuid oibre ina dhiaidh sin. Tá sé mar aidhm ag an gComhairle a chinntiú go mbeidh tairbhe fhadtéarmach ag baint leis an infheistíocht seo i bhforbairt scileanna Gaeilge na foirne agus i bhfeabhsú na seirbhísí trí Ghaeilge do phobal an chontae.