Beidh Raidió Fáilte i mBéal Feirste ag tabhairt faoi chraolatón beo 24 uair an chloig gan bhriseadh an deireadh seachtaine seo mar chuid de chlár imeachtaí Fhéile an Phobail, agus gealltar meascán leathan de chláir chainte, cheoil agus shiamsaíochta do lucht éisteachta na Gaeilge.
Cuirfear tús leis an gcraoladh speisialta ag 7.00am Dé hAoine, an 24 Iúil, agus leanfaidh sé ar aghaidh go dtí 7.00am Dé Sathairn, an 25 Iúil. Le linn na tréimhse sin, beidh 24 clár éagsúil á gcraoladh, ag plé ábhair a bhaineann leis an gcultúr, leis an tsochaí, le cúrsaí reatha agus le saol an phobail. Beidh cláir cheoil agus seiteanna DJ mar chuid den sceideal freisin, go háirithe sna huaireanta beaga don lucht éisteachta a bheidh fós ina ndúiseacht.
Idir 10.00am agus 2.00pm Dé hAoine, beidh an fhoireann ag craoladh beo ó spás imeachtaí Raidió Fáilte ar an mbunurlár ar Shráid Dhuibhise. Tá cuireadh oscailte tugtha don phobal bualadh isteach, cupán tae a bheith acu agus páirt a ghlacadh mar lucht féachana le linn an chraolta.
Ag labhairt di faoin gcraolatón, dúirt Príomh-Irischraoltóir Nuachta agus Cúrsaí Reatha Raidió Fáilte, MaryClaire Nic Uilliam, go bhfuil sí ag súil go mór leis an imeacht.
“Is é seo an dara huair dom a bheith ag glacadh páirte san imeacht seo. Bhain mé an oiread sin sult as anuraidh. Leis an gcraolatón feiceann tú craoltóirí deonacha agus daoine nach bhfaca tú le tamall fada ag teacht ar ais le chéile,” a dúirt sí.
Mhínigh sí freisin go dtugann an craolatón deis di ábhar éagsúil a chur os comhair an lucht éisteachta seachas an gnáthchlúdach nuachta. Beidh sí féin, in éineacht lena comhláithreoirí Éanna Ní Ghriabhaigh agus Aibreán Ní Ír, ag cur clár speisialta i láthair i rith na hoíche ina bpléifear scéalta nach mbíonn le cloisteáil ar ghnáthchlár nuachta.
Dúirt MaryClaire go mbeidh “oíche agus lá den chéad scoth” i ndán don lucht éisteachta agus chuir sí fáilte roimh aon duine ar mian leo cuairt a thabhairt ar an stáisiún i rith an lae.
Beidh an craolatón le cloisteáil ar 107.1FM i gceantar Bhéal Feirste agus ar líne ar fud an domhain trí shuíomh gréasáin Raidió Fáilte www.raidiofailte.com agus ar aip Raidió Fáilte.