Beidh ceol agus cultúr Uladh i gcroílár an aonaigh nuair a chraolfar Fleadh Folk ar TG4 Dé Máirt, 4 Lúnasa ag 9.30pm, mar chuid den chomhaireamh síos go Fleadh Cheoil na hÉireann 2026, a bheidh ar siúl i gCathair Bhéal Feirste den chéad uair riamh. Craolfar an clár freisin ar BBC One Northern Ireland agus ar BBC iPlayer Dé Domhnaigh, 2 Lúnasa ag 10.30pm.
Is iad John Toal ó BBC Radio Uladh agus Jane Rea a chuireann an clár i láthair. Tugann siad an lucht féachana ar aistear ceoil ar fud Thuaisceart Éireann, le cuairteanna ar ranganna ceoil thraidisiúnta i bPort Rois, seisiúin i mBéal Feirste, Fleadh Uladh i bPointe an Chaisleáin Rua agus ceolchoirm speisialta a taifeadadh i Halla Mandela i mBéal Feirste ar an 21 Iúil.
Dúirt John Toal go raibh sé bródúil páirt a ghlacadh sa tionscadal. “Tá áthas orm a bheith mar chuid den ócáid stairiúil seo. Beidh an clár ina cheiliúradh ar na snáitheanna éagsúla a dhéanann ár gcultúr ceoil chomh sainiúil,” a dúirt sé.
Dúirt Jane Rea gur ceiliúradh é Fleadh Folk ar na healaíontóirí agus ar an gceol a choinníonn traidisiúin an oileáin beo. “Is pribhléid é a bheith páirteach ann agus blaiseadh a fháil den mhéid atá le teacht ag an bhFleadh féin,” a dúirt sí.
Leagann an clár béim ar na fréamhacha comhroinnte atá ag ceol traidisiúnta Gaeilge, ceol Ultach Albanach agus ceol tíre comhaimseartha. Ó rithimí an druma Lambeg agus an bhodhráin go foinn fidle, píobaireacht, amhránaíocht agus damhsa, léirítear saibhreas agus éagsúlacht cheol Uladh.
I measc na gceoltóirí a bheidh le feiceáil tá The Blackwater Céilí Band le Andy McGregor and Friends, The Reuben Agnew Trio, The McKenna Family, Gino Lupari, Dermot Byrne, Stevie Dunne agus léiriú speisialta réamhthaifeadta ó Foy Vance.
Beidh gearrscannáin faoin traidisiún ceoil ar oileán na hÉireann agus buaicphointí ó imeachtaí Fhleadh Uladh i bPointe an Chaisleáin Rua mar chuid den chlár freisin.
Is comhléiriú idir Clean Slate Productions agus Beloved Productions é Fleadh Folk, le tacaíocht ó Chiste Craoltóireachta Gaeilge agus ó Ulster-Scots Broadcast Fund de chuid Northern Ireland Screen, chomh maith le TG4 agus BBC. Ina theannta sin, beidh an tsraith faisnéise trí pháirt Folk Aduaidh, a scrúdaíonn stair cheol tíre Uladh ón 18ú haois go dtí an lá inniu, ar fáil le féachaint ar Bhailiúchán Gaeilge BBC iPlayer.