Bhain táirgeadh grianfhuinnimh in Éirinn buaic nua amach i mí an Mheithimh, agus tháinig níos mó ná 40% den leictreachas a gineadh sa tír ó fhoinsí in-athnuaite den chéad uair i mbliana, de réir sonraí sealadacha a d’fhoilsigh EirGrid.
Léiríonn na figiúirí gur chuir fuinneamh na gréine 8.2% leis an meascán breosla foriomlán le linn na míosa. Is méadú é sin ar an 7.8% a taifeadadh i mí na Bealtaine agus ar an 5.3% a bhí ann sa tréimhse chéanna anuraidh. De réir EirGrid, is é seo an méid is mó grianfhuinnimh a taifeadadh ar chóras cumhachta na hÉireann go dtí seo.
Ar an iomlán, tháinig 42% den leictreachas a úsáideadh i mí an Mheithimh ó fhoinsí in-athnuaite. Ba é fuinneamh gaoithe an fhoinse ba mhó fós, agus chuir sé 30.7% leis an meascán breosla. San iomlán, gineadh 821 Gigeavatuair (GWh) de leictreachas ó ghaoth le linn na míosa.
Ba ó ghás a tháinig 40% den leictreachas a gineadh, agus iompórtáladh 17% den soláthar trí idirnascairí idir Éire agus tíortha eile. Idir an dá linn, thit an t-éileamh iomlán ar an gcóras leictreachais go 2,676 GWh i mí an Mheithimh, i gcomparáid le 2,794 GWh i mí na Bealtaine.
Tá EirGrid freagrach as cothromaíocht a choinneáil idir soláthar agus éileamh ar an gcóras leictreachais gach nóiméad den lá, chomh maith le pleanáil fhadtéarmach don bhonneagar fuinnimh.
Le déanaí, d’fhoilsigh an eagraíocht a Straitéis Chorparáideach nua don tréimhse cúig bliana amach romhainn. Ceann de phríomhcholúin na straitéise ná an t-aistriú chuig córas fuinnimh níos glaine, ina mbeidh béim ar leibhéil níos airde fuinnimh in-athnuaite agus ar theicneolaíochtaí nua.
Tá sé mar sprioc ag EirGrid go mbeidh an córas cumhachta in ann suas le 95% den leictreachas a ghineann sé a fháil ó fhoinsí in-athnuaite ag aon tráth faoi 2030, agus 100% faoi 2035. Faoi láthair, is féidir leis an gcóras suas le 75% de leictreachas ó fhoinsí in-athnuaite a láimhseáil ag aon am amháin.
Dúirt Charlie McGee, Bainisteoir Oibríochtaí Córais ag EirGrid, gur mhí thábhachtach eile a bhí i mí an Mheithimh d’fhuinneamh na gréine in Éirinn.
Dúirt sé gur chuidigh an aimsir ghrianmhar leis na torthaí láidre, ach gur léiriú iad freisin ar an dul chun cinn atá déanta maidir le feirmeacha gréine ar scála mór a chomhtháthú leis an gcóras leictreachais. Thug sé le fios freisin gur sáraíodh an tairseach 1 GW de chumhacht ghréine ar scála na heangaí níos luaithe i mbliana, rud a léiríonn fás leanúnach na hearnála in-athnuaite in Éirinn.