Tá dhá scéim maoinithe fógartha anois chun tacú le himeachtaí Gaeilge agus Gaeltachta mar chuid d’Oíche Chultúir 2026, a bheidh ar siúl ar fud na tíre Dé hAoine an 18 Meán Fómhair.
Tá an tOireachtas, i gcomhpháirt le hOíche Chultúir, ag lorg iarratas ó ghrúpaí agus eagraíochtaí taobh amuigh de na ceantair Ghaeltachta chun imeachtaí Gaeilge a reáchtáil mar chuid den cheiliúradh náisiúnta. Is é seo an t-aonú bliain is fiche den tionscnamh, agus tá sé mar aidhm aige líonraí Gaeilge a neartú ar fud an oileáin trí thacaíocht airgid agus phoiblíochta a chur ar fáil. Beidh deontais suas le €250 ar fáil, cé gur féidir cás speisialta a dhéanamh d’ócáidí eisceachtúla.
I measc na réimsí a mbeidh fáilte rompu tá ceol, damhsa, litríocht, scannán, oidhreacht agus na taibhealaíona teangabhunaithe, cé nach gcuirfear disciplíní eile as an áireamh. Is é Dé Céadaoin an 10 Meitheamh, an spriocdháta. Tá foirm ar fáil ag www.antoireachtas.ie
Idir an dá linn tá Ealaín na Gaeltachta tar éis a scéim féin a sheoladh do dhaoine aonair agus do ghrúpaí laistigh den Ghaeltacht, le maoiniú suas le €1,000 ar fáil d’imeachtaí a spreagfaidh rannpháirtíocht an phobail agus an aosa óig. Tá béim faoi leith á cur ar thograí a bheidh inrochtana agus cuimsitheach do chách. Is é Déardaoin an 4 Meitheamh an spriocdháta sa chás sin. Is féidir critéir agus foirm iarratais a fháil ar www.ealain.ie.
Dúirt Ceannasaí an Oireachtais, Máirín Nic Dhonnchadha, gur deis thábhachtach í Oíche Chultúir chun “an Ghaeilge mar fhórsa beomhar, cruthaitheach” a chur chun cinn. Léiríonn an dá scéim, dar léi, saibhreas agus fuinneamh phobal cultúrtha na Gaeilge ar fud na tíre.